වස් අවසානයේ සිදු කෙරෙන

අප භාග්‍යවත් සම්බුදුරජාණන් වහන්සේ දිවමන්ව වැඩ සිටි යුගයේ සිට අද දක්වාම බුදුරජුන් විසින් පනවන ලද විනය ප්‍රඥප්තියට අනුකූලව හා චිරාගත සම්ප්‍රදානුකූලව උපසපන් භික්ෂූන් වහන්සේලා විසින් සෑම වසරකම ඇසළ පුන් පොහෝ දිනට පසු දිනින් ඇරැඹෙන වස් තුන් මාසය තුළ සාසනික වත් පිළිවෙත් පුරමින් එක් සේනාසනයක වැඩ හිඳ වස් සමාදන් වීම සිදු කරනු ලබත්. වස් තුන්මාසය අවසානයේ වප් පුන් පොහෝ දින දී සිදු කළ යුතු මහා පවාරණයෙන් පසු වස් නිමකළ භික්ෂූන් වහන්සේලාහට කැමති නම් දහම් චාරිකාවේ වැඩම කිරීමට විනයානුකූල අවසර හිමි වේ. මෙසේ චාරිකාවේ වැඩම කිරීමට මත්තෙන් එම භික්ෂූන් වහන්සේලාගේ සිවුරු පිළිසකර කිරීමටත් දුබල සිවුරු බැහැර කර අළුත් සිවුරු ලබා ගැනීමටත් එළඹෙන ඉල් පොහොය දක්වා වන චීවර මාසය බුදුරජුන් විසින් අනුදැන වදාරන ලදී.

මෙම චීවර මාසය තුළ යොදාගත් දිනෙක දී ගිහි පිංවතුන් විසින් භික්ෂූන් වහන්සේලාගේ අණ කිරීමකින් තොරව තමන්ගේම කැමැත්තෙන් සංඝයා උදේසා පූජා කරන්නාවූ චීවරයක් කඨිනත්ථාර විනය කර්මය මඟින් සංඝ සම්මුතියෙන් කඨින චීවරයක් ලෙස එම සේනාසනයේ මනාකොට වස් සමාදන් වූ උපසපන් භික්ෂූන් වහන්සේ නමක් වෙත පැවරීමට හැකි වේ. එවිට එම භික්ෂූන් වහන්සේහට තම පැරණි චීවරය බහැර කොට එම කඨින චීවරය අදිටන් කොට පෙරවිය හැකිය. මෙසේ එම කඨින චීවරය ලබා ගත් භික්ෂූන් වහන්සේහට බුදුරජුන්ගේ පැනවීමට අනුව අනුසස් පසක් ලැබේ. එනම් එම භික්ෂූන් වහන්සේහට සුවසේ තම චීවරයන් සකස් කර ගැනීමටත් චාරිකාවේ වැඩම කිරීමටත් පහසු වන පරිදි උපසම්පදා සීලයට අයත් ශික්ෂාපද කිහිපයක තාවකාලික ලිහිල් වීමක් සිදු වේ. භික්ෂුවක්හට ලැබෙන කඨිනානිසංස යනු මෙයයි. එසෙම එම සේනාසනයෙහි මනාකොට වස් සමාදන් වූ අනෙක් උපසපන් භික්ෂූන් වහන්සේලාහටද මෙම කඨිනානිසංස අනුමෝදන් විය හැක. එසේ කිරීමෙන් එම භික්ෂූන් වහන්සේලාහට ද එම කඨිනානිසංස හිමි වේ. මේ අයුරින් අප මහා කාරුණික බුදුරජාණන් වහන්සේ “අනුජානාමි භික්ඛවේ කඨිනං අත්ථරිතුං!” “මහණෙනි කඨිනය ඇතිරීමේ විනය කර්මය අනුදනිමි” යනුවෙන් ශ්‍රාවක සංඝයාහට චීවරාදී ප්‍රත්‍ය පහසුකම් ලබමින් සසුන් පිළිවෙතෙහි යෙදීමට හැකි වන පරිදි කඨිනානිසංස ලැබෙන්නාවූ කඨිනත්ථාර විනය කර්මය අනුදැන වදාළ සේක. යම් සැදැහැවත් ගිහි උපාසකයෙක් හෝ උපාසිකාවක් විසින් පූජා කරන ලද චීවරයක් පදනම් කර ගනිමින් භික්ෂු සංඝයාහට බොහෝ ප්‍රත්‍ය පහසුකම් ලබා දෙන්නා වූ යම් විනය කර්මයක් තිබේ නම් ඒ කඨිනත්ථාර විනය කර්මය යි. කඨින චීවර පූජාව මහත්ඵල මහානිසංස යැයි සැළකෙනුයේ මේ හේතුව නිසා ය.